La Usc di Ladins

L’Istitut Cultural Ladin vel recordèr chest emportant cedean con na scontrèda che vel envièr i fascegn a cognoscer miec la ritajon del storich che ge à dat a noscia comunanza i fondamenc de sia identità ladina.

Sia gran opera de storich, archivist e poet, che à metù adum na rica arpejon de documents da el regoec e enlouta consegné a l'Istitut Cultural Ladin, vegnarà metuda al luster ai 11 de firé da les 17:00 a Sèn Jan, te senta de la Biblioteca de l’Istitut Cultural Ladin che la é dedichèda apontin a Pare Frumenzio Ghetta.

Chesta scontrèda, che à desche obietif la valorisazion de sia produzion culturèla, l’é ence na ocajion de confront e dialogh sun sia arpejon scientifica e umana, su coche sia enrescides, sie documents e sia idees les sie cresciudes e madurèdes tel temp e les abie dat fruc preziousc.

L program, portà dant dal storich Cesare Bernard e dal diretor de l’Istitut Cultural Ladin Fabio Chiocchetti, l perveit i intervents de: Daniele Verra, curador del fon documentèl; Stefano Riz, ensegnant de letres te la Scola Ladina de Fascia; Luciana Chini, restauradora te l’Archivie de Stat de Trent; Italo Franceschini, diretor de la Fondazion Biblioteca San Bernardino de Trent e Marcello Bonazza president de la Società Studi Trentini di Scienze Storiche. 

Siede duc envié de cher te senta de la Biblioteca “Pare Frumenzio Ghetta” de l’Istitut Cultural Ladin en mèrtes ai 11 de firé da les 5 domesdì, per ge fèr onor a nosc maor storich fascian, cognoscer sia opera e veder coche la vegn portèda inant.

De più su La Usc stampèda de vender ai 7 de firé.  (lg)