La Usc di Ladins

»De spes i studenc de le scole più dalonc da la zità, descheche l’é chela de Fascia, i à manco ocajion per tor part a evenc con dozenc universitaries e scontrade olache vegn debatù a n livel aut temes emportanc. Noi aon volù ge sporjer a nesc studenc chesta ocajion.« Coscita à dit la Sorastanta de la Scola Ladina de Fascia Mirella Florian, che en mercol ai 5 de firé, ensema con l professor Antonio Sanfilippo à endrezà te sala grana de la Sorastanza na meisa torona dal titol »La dignità dell’uomo e del sio morire« coi studenc de IV e V di Licees de Fascia.

L professor Sanfilippo, che l’ensegna religion ti licees fascegn e l’é dò a se spezialisèr en filosofia a l’Università de Trent, l’é stat l contat per fèr ruèr te val 4 relatores de ecezion: l prof. Don Fiorenzo Chiasera, dozent emerit de Teologia morala al ISSR, l’Istitut de Scienzes religiouses de Trent; l prof. Fabrizio Meroi, dozent de Storia de la filosofia a l’Università de Trent, l prof. Francesco Ghia, dozent de Filosofia morala semper a l’Università de Trent e la d.ra Marta Fasan, che la é dò a fèr l dotorat te la Facoltà de Giurisprudenza de Trent.

Chisc cater relatores ge à sport ai studenc stimoi enteressanc per soscedèr la riflescions sun desvalives aspec e dinamiches fones che revèrda la vita e la mort de la persona, dai desferenc ponts de veduda religious, filosofich e antropologich, cultural e giuridich.

De più su La Usc stampèda de vender ai 14 de firé 2020.  (lg/tz)