La Usc di Ladins

Fèsc cruzièr la situazion sanitèra te Fascia. Desche te duc i lesc de turism o de gran prejenza de jent, se é dò a paèr per la gran fola de jent stata chiò anter la fin de firé e i prumes de mèrz. L situazion é grieva soraldut ti Comuns de Cianacei e de Ciampedel, olache l’é respetivamenter 49 e 16 sentadins ciapé dal virus, n numer che a livel perzentuèl passa via te duc doi i comuns  l 2% de la popolazion. Ence Sèn Jan à na situazion grieva, con 26 positives.  I dac provinzièi dèsc dapò 6 positives a Mazin, 5 a Soraga e 8 a Moena. 

Fin ades l’é stat ofizialmenter 2 morc da coronavirus te Fascia, dotrei i é atualmenter en terapia intensiva o te ospedèl en condizions no lijieres; i etres i é te sia majon (la maor pèrt) o te ospedèl, ben segur dò e dò sot control ma con sintoms no tant pesoches.

Aldò del sistem de rilevazion metù a jir da la Provinzia de Trent, l’é da dir che podessa esser che no duc chisc i aesse fat n tampon resultà positif, ajache chi che à sintoms da Covid 19 e i é stac apede a na persona positiva i vegn conscidré positives te la rilevazions de la PAT ence zenza fèr l tampon.

L’é da dir che apede a chisc l’é ence n muie de etres (se pel calcolèr 3 o 4 persones per ogneun di positives) che i é a cèsa en carantèna zenza aer nesciun sintom, ma da l’autra man l’é da recordèr che n’é ence n muie che da Covid 19 i varesc.

L’é n moment de gran stress e fadìa soraldut per i operatores sanitères, ma ence per n muie de etres lurieranc, desche chi che laora te la boteighes de roba de prum besegn, e ence per i Ombolc de Fascia, che i é rsponsaboi de la vita e de la sanità de si sentadins.

“Nos ge sion vejins a noscia comunanza, ence se no podon aer contac diretamenter con i sentadins – disc l’ombolt de Cianacei Silvano Parmesani. Gé peisse che noscia jent te chest moment l’aesse soraldut besegn de mingol de fiduzia e de positività. Cognon scombater na batalia contra n nemich che no se veit, e per chest l’èrma miora che aon l’é chela de se sconer ence nos, stajan te cèsa. Ma gé peisse e spere che te pech l moment pior sie passà e che pian pian se posse denef tachèr a vardèr inant con manco cruzie e che saron più forc che dant.”

“Noi aon vardà, en cordanza con duc i ombolc, de meter a jir sobito ordenanze ence più strente de chele che era pervedude a livel nazional e provinzial – disc l’ombolt de Sèn Jan Giulio Floria. Jà l’auter vender, canche aon vedù che l’era jent, tant da Fascia che da fora, che jìa co le pel, aon serà le val laterale de Gardecia e Sèn Nicolò. Al scomenz l’é stat critiche, ma ades me sà che la jent la sie più responsabola, la respete de più l’obligh de jir fora demò per besegn. A chesta vida speron de esser bogn de jir fora da chest burt moment al più prest. ”

 (Lucia Gross)