La Usc di Ladins

Lucia Dellagiacoma dal Malghèr la é infermiera da 35 egn, la é caposala de l’assistenza teritoriala te Fascia, n post de gran empegn e responsabilità, apede chest l’à familia e ence n refuge de familia, na atività olache canche la pel la dèsc na man. Enceben dut chest, enstadì l’à arjont n master con n projet pilota  su la reduzion del stress te la persones che vèrda via familiares con demenza.

Ge aon domanà che la ne conte.

É fat n master de prum livel en medejina complementara, n setor che me à semper piajù, che l tol ite dut chel che compagna la medejina tradizionala desche agopuntura, omeopatia, fitoterapia, shiatsu, yoga, pet therapy e c.i. Peisse che per varir le medejine le serf, canche l’é de besegn, ma peisse che pel esser ence de autres sistemes che ne deida a star segn e soraldut peisse che sie emportant vardar tant al corp che a la ment.

Endana chisc studies me é embatù te la costion del stress, de coche l stress e le emozion pel esser a fondament de malatìe. É volù studiar la reduzion del stress del caregiver, che l’é apontin chel che ge stasc dò a na persona con demenza, no duran medejine ma con autres sistemes de la medejina complementara. Me é pissà de far n studie pilota, con part de la tesi per spiegar la teoria e dapò l projet. A vardar fora i desvalives sistemes é cernù yoga e meditazion, ajache i studies di ultimes egn moscia che chisc i pel mudar l stress, l risech de se malar e ence anatomicamenter l cervel, ajache muda la ones tel cervel e i efec che le dasc.

Via per l’istà passà é contatà la Rencureme, che l’é la sociazion che da egn te val la deida le familie olache l’é na persona con demenza e l’aea ence metù a jir projec per sostegnir i caregivers. Ge é fat mia proponeta e te la Rencureme i l’à touta sù sobito con gaissa e i me à dat n gran aiut.

De più su La Usc stampèda de vender ai 29 de mé 2020.

 (Lucia Gross)