La Usc di Ladins

Ai 18 de jugn l'é stat manà fora na letra da man de n grop de genitores con bec che va a la scolina de Cianacei, en resposta a la comunicazion, ruèda apontin a la families di bec doi dis dant, che à lascià fora a seconda di criteries provinzièi valgugn di bec per i meisc de messèl e aost 2020. La letra é stata sotscrita da n lonch numer de firmes.

»La scolina de Cianacei da pech restruturèda a opera del Comun de Cianacei – se lec –  l'à 3 sezions, 6 gran sales con 7 ensegnanc, 4 persones che deida e un chech. Te na situazion de normalità la Scola tolessa ite chest an 65 bec, aboncont dal prum de messèl manco che la metà podarà jir ite, ajache a seconda di criteries de prezedenza metui dant da la Jonta Provinzièla (delibera n. 740 d.d. 03/06/2020) l'acolienza la é resservèda a demò 30 bec per la sajon da d'istà«.

I genitores met dant che Fascia l’é n lech turistich, olache i servijes a la familia endrezé da la istituzions scolastiches e comunèles i é essenzièi e i cogn esser per duc; defat ence la lege provinzièla 21 mèrz 1977 n. 13 la disc che la scolines les cogn sporjer la medema oportunitèdes de educazion per i bec, che les porte a n comun livel culturèl de basa e zenza nesciuna discriminazion. Chest, se lec te la letra, no vegn fat se i posć a la leta i no é per duc, crean na desvalivanza de oportunità.

Ge vel ence recordèr che sion dò che vegnon fora da n temp senester, meisc de isolament sozièl che, à dita de n muie de esperc, à fat padir soraldut i più joegn e ge volessa per chest ge dèr a duc l met de troèr mingol de normalità e sozialità, e de chest l'é rich l'ambient de la scolina.

»Ajache nosc zil l'é de portèr inant n dialogh produtif con i orghegn competenc e ruèr a proponetes costrutives, domanon de valutèr de tor ite duc i bec enscinué a la scolina ge arseguran la medema degnità ai bec e n giust sostegn a duta la families. L'ipotesa podessa esser de sporjer manco giornèdes a duc, ma de slarièr la perferida a duc chi che à derit«. I genitores volessa donca che enveze che tor ite 30 bec per 5 dis en setemèna, vegnissa tout ite duc chenc, i fajan jr demò 2 o 3 dis en setemèna. Na rotazion che redujessa l temp de ogne bez te scolina, ma che ressolvessa l problem di numeres.

I genitores domana amò deschirimenc, e mudamenc su la dezijion di numeres: la linies vida de la Jonta sui servijes ai bec de 3-6 egn les perveit doi desvalives momenc per i ensegnanc, con na comprejenza de doi ensegnanc per amancol 3 ores su 7 e nia comprejenza per l'auter temp. »L numer de bec resta aboncont l medemo, desposizion che no se capesc, soraldut se confrontèda a la imposizion de la limitazion de mascimo 10 bec per sezion. No se enten la esigenzes che à spent envers la cernia de chisc numeres, domanon de i mudèr, smaoran la capienza en rejon de la lèrga desponibola per ogne istitut scolastich, pervedan se serf l'assunzion de nef personal per garantir l servije a duta la families«.

Per serèr, i genitors domana ence confermes e garazìes su l'atività scolastica che cogn pontèr via de otober. »Nesc fies l'é l davegnir del Trentin e volon creer che la PAT volesse investir sul davegnir de sie/nosc teritorie e su la formazion de duc i componenc de sia sozietà, no lascian endò i più picoi«.  (DV)