La Usc di Ladins

Touc dant dai dirigenc de la strutura - l diretor Pierantonio Scappini e i responsaboi de vèlch un di partimenc - l president de la Provinzia Maurizio Fugatti e l'assessora provinzièla a la sanità Stefania Segnana é rué te l'ospedèl de Ciavaleis, compagné dal diretor generèl de l’Apss Paolo Bordon e dal dirigent del Departiment sanità Giancarlo Ruscitti. La vijita à dat l met de fèr l pont de la situazion dò la fasa più empegnativa de l'emergenza Covid e de testimonièr la vejinanza de la istituzions al personal de l'ospedèl, n muie empegnà ti meisc passé a cajon de la pandemia.

»L sistem sanitèr trentin, con sie ospedèi de val – à dit Fugatti – l'à sapù fèr grop dedant a l'emergenza de gra ence a la gran profescionalità e umanità del personal. Anché se palesa tant fort che l’é l raport anter la comunità locala e sie ospedèl. Sion spervaji che l sistem sanitèr no l posse vegnir endrezà demò a livel zentrèl ma che enveze sie de besegn de investir sul teritorie. Del 2026 ence l Trentin ge darà alberch a la Olimpiades e cognon pissèr ence a chest luran ai projec per l davegnir de chest ospedèl«.

L'assessora Segnana à palesà sie rengraziament a duta la strutura, ai dotores, ai infermieres, ai Oss, a duta la persones che laora te ospedèl e che te chisc meisc se à dat jù con gran empegn per arsegurèr la mior assistenza possibola. 

L president de la Comunità teritorièla de Fiem Giovanni Zanon e la procuradora del Comun general de Fascia Elena Testor i ge à consegnà al personal doi targhes che testimoniea la recognoscenza e la vejinanza de la comunità locala per l lurier che l’é stat fat e che l vegn arsegurà ogne dì da la strutura.

A la vijita à tout pèrt ence i conseieres provinzièi Gianluca Cavada, Pietro de Godenz e Luca Guglielmi estra che vèlch ombolt.

La funzion de l'ospedèl de Ciavaleis, à spiegà l diretor generèl de l’Apss Paolo Bordon, l’é stat fondamentèl te na fasa de emergenza grieva per Fiem e Fascia; l'à gestì n muie de malé Covid te na strutura mudèda fora con svelteza, che l'à cognù lascèr sù la ativitèdes ordenères per secodir i besegnes de la popolazion. »Ades – l'à spiegà Bordon – l’é stat orì endò l partiment de nasciuda e l’é tacà endò la ativitèdes de chirurgìa generèla e ortopedìa. L’atività é limitèda da la normes sul distanziament e su la segureza, ma l’é l'empegn de duc per scomenzèr via da nef a portèr inant noscia solita atività de gran emportanza«.  (LG)