Anter duta la ativitèdes che la pandemia à ferà l’é stat ence i lurieres te la scolina de Sèn Jan che era giusta taché, n intervent emportant per smaorèr l frabicat di egn ’60 e l fèr più modern, funzionèl e adatà a la normatives.
Entorn a la metà de oril se à podù scomenzèr da nef i lurieres e chisc dis passé la presidenta de l’Ent Gestor Alessandra Cloch, con vèlch component del diretif, à fat n soralech col projetist e diretor di lurieres Alessandro Tamion.
L projet pervedea che l veie garasc per l pulmin vegne tout ite e coleà a la scola: l’idea era de meter la cèsa da fech al post del garasc per smaorèr l spazie olache i bec va a magnèr. Ades chest nef volum l’é ruà a cuert e se taca a veder la situazion, amò apede l’é stat rejonà de la destinazion da ge dèr al gran spazie che se à librà te sot, n muie lumenous, vedù che la despensa e i magasins é stac realisé neves sot l volum de la cèsa da fech.
L’é stat dit che te chest spazie se podessa creèr na sala riunion, de valuta ence per l fat che la pel aer l’entrèda autonoma. Dapodò duc à podù veder l nef luminarie realisà sun cuert che ge dèsc gran lum al spazie comun di bec, olache i matea canche no i pel fora, che inant l’era belebon scur.
L lurier portà inant l’é stat aprijià dai raprejentanc de l’Ent Gestor: »Noi a man a man jon a veder coche va inant l lurier e per endana va dut ben – l’à dit la presidenta Cloch – no l’é stat nesciuna sorpresa e donca nesciun empediment. Sion n muie sodesfac de coche l’é dò che l doventa.«
Podede troèr l'articol entriech su La Usc 26 di 3 de messèl (Cristina Marchetti)
Valorisazion e recalificazion per la Scolina de Sèn Jan
Chisc dis passé l’é stat n soralech per valutèr coche va inant i lurieres con vèlch raprejentant de l’Ent Gestor e l projetist
Galaria retrac
View the embedded image gallery online at:
https://www.lausc.it/valedes-ladines/fascia/12994-valorisazion-e-recalificazion-per-la-scolina-de-sen-jan#sigProIdb30ee9c150
https://www.lausc.it/valedes-ladines/fascia/12994-valorisazion-e-recalificazion-per-la-scolina-de-sen-jan#sigProIdb30ee9c150