La Usc di Ladins

Bèsta che se tache a veder mingol de trafich su la strèdes che ogne an sauta fora la costion del trafich sui jouves. Limitazions o avertura? Chisc dis l’argoment é endò stat trat cà enceben che oramai sion jà a la metà de messèl e tachèr ades a se cruzièr de regolamentazion servissa ben a pech. L’ombolt de Cianacei Silvano Parmesani domana da temp na scontrèda anter la Comiscion de Comun metuda sù aposta e i assessores de la Provinzia de Trent Failoni e de Busan Alfreider.

Contra ogne limitazion se palesa l conseier provinzièl ladin Guglielmi che fèsc a saer che, fazile dò i 18 de messèl, la Provinzia de Trent prejentarà i resultac del control con la telecameres metudes sun Sela amò de dezember del 2019. Per chest istà 2020 vegnarà fat maor controi da man de la Forzes de l’Orden soraldut su le moto per verifichèr i rumores e se les é en regola e smaorà l trasport publich con corieres ogne chèrt de ora. Endèna che se speta n projet complessif e concret per la defendura de nosc teritorie, patrimonie de l’Unesco. 

De più su La Usc 27 de doman, vender ai 10 de messèl   (Monica Cigolla)