Edoardo Felicetti: »La jent à soravalutà l dejaje«

Data

03 de agost 2020

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
L’ombolt de Moena spiega le rejon de aer avert n cantier te paìsc tel pien de la sajon
Rejonon di lurieres te Ciasa de Comun. De che lurieres se tratel?
Edoardo Felicetti: Cognon far fora l pe pian del comun coscita podon spostar i ambulatories te la part evers sud a na vida che i sie int dret a strada e no sarà più l problem de la bariera architetonica. L’era n projet preliminar rità da la velgia aministrazion che noi aon ciapà te man. Del 2019 sion stac bogn de ciapar i scioldi col Fondo Strategich. Ajache noi ge aon zedù na part del nosc a Ciampedel, che i l’à dorà per la senta di Pompieres, l’assessor Daldoss ne à dat le ressorse da n fondo de resserva provinzial. Dant però aon cognù far fora la senta neva di Polins per i spostar.

I sentadins à domanà de no tacar ite ades coi lurieres, no podaade i sperlongiar?
Podeane cerner de se fermar e far chest uton ma noi saon che ti programes de setember cognarà tacar via tropes autres mestieres percheche Vaia e l’ègajon i à lascià tropes segnes e fin ades l’é semper stat somme urgenze da far.

Spetar amò n meis aessel cambià valch?
Chi che no l’é int no capisc che che vel dir cogner tacar via n mestier, soraldut un desché chest. No l’é n frabicat che vegn svöidà e ge vegn laorà int. Chigiò cogn coesister i mestieres per far fora con le atività de comun, aon i telefoni, le reti, i server, le lum. N cantier desche chest l’é n gran empegn per i ofizies tecnics de comun. L sperlongiar voleva dir che chest uton enveze che far autres mestieres se cogneva amò ge star dò a chest e seghitar a spostar inant le robe. A Moena te chest moment l’é coscita, aon na montagna de robe da far, cognon vardar de far dut tel temp più curt e no podon se permeter de se fermar.

Ma la comunanza Ve à domanà de spetar…
Giö pense che l’é stat soravalutà l dejaje da man de la jent. Cognon capir che l’é n mestier de demolitor e de rumor fosc amò per na setemana e te cerc oraries, da le nöf a mesodì e da le trei a le set, dapodò sarà dut mestieres da far daint che no dasc d’empaz. Se noi vardon l minimo dejaje che averon e l gran besogn che l’à Moena de portar inavant i laores te chest moment, metude ensema cheste doi robe é retegnù de cogner jir inavant.

L'intervista entrìa la podede troèr su La Usc 30 de angern, vender ai 31 de messèl
 (Monica Cigolla)