La Usc di Ladins

En vender passà la Jonta de la Provinzia Autonoma de Trent à nominà i dirigenc che col prum de setember rejarà i desvalives istituc de scola del Trentin e che arà l’encèria no sorida de endrezèr dut per tachèr via n an de scola più senester e delicat che zenza per l’obligh de arsegurèr tel medemo temp l derit a l’ensegnament di bec e la segureza sanitèra.
Te la delibera, per chel che vèrda la Scola Ladina de Fascia, vegn confermà che la Sorastanta Mirella Florian jirà en penscion, ma no vegn nominà nesciugn a so post. Chesta nomina – l’é scrit – vegnarà fata più inant ajache dant ge vel aer la cordanza con l Comun general de Fascia perveduda da la normes.
Te n meis donca zachei cognarà tor sù l’encèria de vidèr la Scola Ladina de Fascia, la più gran »azienda« de val, con 1400 scolees e studenc e 200 dependenc, ma amò no se sà chi che sarà chiamà a chest ruol delicat e strategich per l duta la val e sie davegnir, e somea che no sie n gran cruzie per chest.

De più su La Usc 30 de vender ai 31 de messèl  (Lucia Gross)