La Usc di Ladins

No podea auter che scomenzèr con la Cianzon de Val de Fascia l domesdì de la domenia de la Festa del Rengraziament. Tras la oujes del Cor Valfassa, la paroles da sentiment de Francesco Dezulian del Garber e la maraveousa armonisazion del Canori l publich te chino Marmolèda de Cianacei te n senteamen se à sentù più apede a nesc aves, che, con gran fadìa e struscies, ne à regalà na val scì preziousa. I ciantores à dapò endeletà l domesdì con »Oh Ciampedìe!« e la »Contìa de Conturina«. Dò n fort batiman i à sturtà sù con »Na viva!«.

Intervenc e saluc
Tel domesdì, prejentà da Monica Cigolla, l’é stat dapò l president Fernando Brunel a tor la parola. Dantdaldut l’à recordà l segnificat veior de la Festa del Rengraziament, moment per rengrazièr l Segnoredie portà inant da l’Union di Ladins de Fascia per ge dir develpai a chi che dèsc sie contribut per la comunanza.  
Brunel ge à dit prum de dut develpai a Don Mario »fascian de adozion che con sia bela paroles l ne dona dute le oute valch de maraveous« e, dò aer saludà la autoritèdes te sala, l ge à sport i augures bon lurier a duc i ombolc, assessores e conseieres de Comun de duta la valèdes ladines e del Comun general de Fascia. L’à portà l salut de la senatora Elena Testor e de la presidenta de l’Union Generela di Ladins Milva Mussner, che no les à podù tor pèrt e l’à saludà la presidenta e la neva diretora de l’Istitut cultural ladin, Lara Battisti e Sabrina Rasom. L ge à sport n ditelpai particolar per l lurier portà inant ti egn passé al diretor de l’Istitut cultural ladin Fabio Chiocchetti e a la sorastanta de la Scola de Fascia Mirella Florian, che se à tout sù na encèria emportant tel Consei de procura del Comun general e l’à recordà l professor Luigi Cincelli che ne à lascià da pech temp.

De più su La USc 41 di 16 de otober  (Nicoletta Riz)