»A scomenzèr dai egn ’60/70 la val de Fascia l’à vivù n mudament sozio-economich ge fajan lèrga a na neva economìa turistica e arbandonan i lurieres e i ritmes del bacan e del pèster«. Coscita se lec te la relazion scrita dal professor Claus Soraperra a prejentazion de sia neva opera, n depent da mur dessegnà te la neva cortina de Sora Murat tel comun de Cianacei.
N passaje economich e de vita sozièla che, sotrissea Soraperra, l no l’é stat zenza dolor, tant che l’à fat nascer n sentiment de encresciujum e l besegn de la comunanza de se tor de retorn e de fissèr la tradizions e la usanzes che la neva generazions risćèa de perder: »L passaje da n passà de fadìa e de fam a na neva situazion che metea dant no demò l bonstèr e l servije ai ghesć, l’aea nezessità de fermèr la memoria e de sotrissèr l’identità de naa«.
La cortina à de chest vers na pèrt fondamentèla desche lech religious, ma ence desche leam anter prejent e passà: »L’etimologìa de la parola ‘cimitero’ rua del grech ‘koimeterion’, che vel dir ‘lech de paussa’. L verb ‘koiman’ vel dir ‘fèr endromenzèr’ e l se referesc al lech de la memoria, olà depositèr l passà per l conservèr e l tegnir semper bon per noscia vita e per la reflescion su la malsegureza de chesta«, se lec amò.
Dut l'articol su la neva opera de Soraperra te la cortina de Cianacei é publicà su La Usc stampèda de vender ai 6 de november. (Daniele Verra )
L nef don de Claus Soraperra
L’artist fascian à depent na neva opera te cortina de Sora Murat a Cianacei.
Galaria retrac
View the embedded image gallery online at:
https://www.lausc.it/valedes-ladines/fascia/13921-l-nef-don-de-claus-soraperra#sigProId57f1dc46d0
https://www.lausc.it/valedes-ladines/fascia/13921-l-nef-don-de-claus-soraperra#sigProId57f1dc46d0