La Usc di Ladins

Con l’obietif de soscedèr la partezipazion di enc locai a la definizion e a l’atuazion de la politiches sanitères, la Provizia de Trent te la L.P nr 16 del 2010 sul stravardament de la sanità te dut l Trentin l’à pervedù a l’articol 10 l’istituzion te vigni comunità de val del Consei per la sanità.
En vender ai 13 de november l Comun General de Fascia à chiamà ite en videoconferenza chest Consei, che l tol ite l Procurador Giuseppe Detomas o sie delegà e i ombolc de Fascia. Tegnù cont di tempes senestres che sion dò a viver per l pericol de l’epidemìa da Covid, a chesta scontrèda l’é stat envià ence i referenc locai del setor sanitèr: l dotor Luca Nardelli de l’APSS de Trent, la caposala de la cures primères Lucia Dellagiacoma, i dotores de medejina generèla che laora te val e l vizepresident de la Ciasa de Paussa de Fascia Fabrizio Demartin, ensema con la Conseiera de Procura con delega al sozièl Mirella Florian, la responsabola di Servijes sozièi del CGF Paola Rasom e la secretèra de l’ent fascian Elisabetta Gubert.
Aon rejonà con la Conseiera de Procura Mirella Florian per capir miec che che l’é vegnù fora da chesta scontrèda.
»L’obietif de chesta convocazion del Consei – ne à dit la Conseiera Florian – l’era chel de monitorar la situazion di contagé dal virus e la resposta del sistem sanitar te noscia val, ajache saon che l’é na situazion en evoluzion, che la cogn vegnir tegnuda dò e dò sot control.«

De più su La Usc 46 di 20 de november  (Lucia Gross)