La Usc di Ladins

Ence i volontadives de la Crousc Biencia de Cianacei à tout pèrt a #Jerusalemachallenge.

Per fèr i augures de Bon An Nef i à abù dassen na bela idea. I à endrezà n bel video su la notes de la cognosciuda cianta Jerusalema. Dant i se à binà duc chenc fora per portech de la senta de Cianacei e dapò con doi mesi i é rué tel piaz de l’elicoter ta Cercenà e i se à metù a balèr a ritm de musega. Jerusalema l’é la ciantia sudafricana de Master KG e Nomcebo Zikode doventèda cognosciuda te dut l mond via per chest an 2020 soraldut dò che n grop de balarins de l’Angola, i Fenomenos do Semba, ge à jontà apede si movimenc de bal. Tout jù te n vidor de Luanda, l video JerusalemaDanceChallenge moscia n grop de amisc che bala e tegn te man piac con roba da magnèr. Endèna la pandemìa del 2020 chest video à arjont n suzess fora de mesura, l’é stat n contage, dal dì a la net, dai departimenc de Polizia de l’Africa, ai melitares, ai dotores, perscin ai preves de ogne pèrt del mond à tacà a meter sui social si video con i bai che ge va dò a la coreografìa de la ciantia Jerusalema.

L poter e l’atrazion de chisc bai l’é la semplizità di movimenc e l fat che semper più jent pel se jontèr apede al bal fin che fenesc la musega. L bel de chesta challenge l’é proprio veder gregn gropes de jent che bala e che fèsc i medemi movimenc. 

L valor de chesta endesfida stèsc tel fat che con chest bal se passa sorafora ogne bariera fisica e del lengaz e soraldut percheche l’é bon de meter ensema la persones, l crea a chesta vida n sens de comunanza, che tel temp del destanziament fisich che sion dò che vivon l’é n muie emportant, l crea benstèr e felizità.

I volontadives e i dependenc de la Crousc Checena de Cianacei no i podea donca cerner na vida miora per slarièr fora a duc chenc i più bie augures de n Bon An Nef 2021. A ic, che via per l 2020 i é stac semper en pruma linea te la pandemìa da Covid, che i se à dat jù più che zenza per portèr didament te ogne situazion, volon ge sporjer nosc develpai. 

»I agnoi de la net« descheche i se scrif tel bel video, vel ge sporjer a duc i augures de n An Nef pien de lum. L video de #Jerusalemachallenge de la Crousc Biencia de Cianacei é da poder veder su la piata Facebook de la sociazion.  (Monica Cigolla)