La Usc di Ladins

En vender ai 5 de firé l’é mort Giusy sun Pordoi. La neva ge à metù pech a se slarièr fora te Fascia e vin Fodom, soscedan ence n muie de marevea, soraldut per chi che la cognoscèa e che ge aea rejonà da pech. Giusy, ti documenc Giuseppa Riviello Dezulian, clasc 1943, no la era malèda, l’à ciapà l bot. En vender n muie bonora dadoman la se à sentù mèl, no l’é stat possibol la didèr ence per chi che vivea a l’Hotel Maria apede ela. I l’à sentuda stèr mèl, ma no l’é stat nia da fèr: sie cher l’à zedù.
L’era na femena de gran carisma, semper averta e a la leta, la persona più cognosciuda de Pordoi, valgugn ge dijea adertura »la sindaca de Pordoi«. L’usc de l’Hotel Maria te duc chisc egn l’é semper restà avert e a vigniun che ruèa la ge sporjea n bel salut e la ge domanèa coche i stajea. Ence endèna l Covid l’à avert l’usc per duc chi che aea debesegn, ence demò per na informazion.
Giusy la lascia n gran vet, l fi Norberto e la fia Katja, i nevoes Rocco e Nora e duc si parents e amisc.

De più sun La Usc di Ladins de chest vender ai 12 de firé  (Valentina Redolfi)