La Usc di Ladins

L era ai 19 de messèl del 1985, da les 12.22 la diga de Prestavel l’à zedù e na gran boa de mauta e materièl à descancelà na val entria: 268 morc anter chisc 28 bec e bezes, 31 joegn e joenes, 120 femenes e 89 omegn. L é passà 40 egn da chela gran tragedia che à lascià mort e desperazion, l’à tocià l cher de duc chenc e amò aldidanché la soscedea recorc che é semper n muie vives.

En sabeda ai 19 de messèl l é stat la comemorazion te cortina de Tieser, resservèda demò ai parenc de la vitimes, con la partezipazion del president de la Republica Sergio Matterella che à pojà na corona de fiores ló dal monument a la vitimes de Stava, inant che vegne sonà l ‘Silenzio’.

Anter na fola de jent e de batimans Mattarella é dapò jit tel teater de Tieser per la zerimonia zivila. Chiò l é stat i intervenc del ombolt Massimiliano Deflorian, del president de la Provinzia de Trent Maurizio Fugatti, del president de la Fondazion Stava 1985 Graziano Lucchi e del professor Stefano Zamagni.
L president Mattarella te sie descors l à sotlineà coche Stava »l é l simbol de na vida falèda de conscidrèr l’atività economica, l vadagn, l raport con l ambient, la valutazion di risesc. La giustizia – l à jontà apede – l’à stabelì la responsabilità, la sequenza di reac, de la negligenzes, de la omiscions, de la desumanità. Chel che no se cogn fèr l é aboncont serèr via chest dejaster te na parentesa. L serèr via te so oror per l sconer, zenza se mesurèr col prejent. No l é giustificazions.«

Da sera te la gejia de Tieser l Piscop de Trent Lauro Tisi à dit messa en recordanza de la vitimes e sobito do l é stat na procescion fin te cortina con la Musega de Tieser.
La domenia enveze, semper te gejia de Tieser, l é stat l conzert per Stava del ensemble de strumenc de la Scola de musega de Fascia e Fiem Il Pentagramma ensema con la Corala Canticum Novum de Moena e la partezipazion de etres corisć che à sonà e ciantà l Requiem de John Rutter, na opera de gran spiritualità e speranza che à tocià dret l cher de duc chenc. Per l’ocajion l é stat portà dant ence na composizion scrita aposta per chesta ocajion del conzert per Stava.

De più su La Usc stampèda de en vender ai 25 de messèl del 2025


 (Monica Cigolla)