La Usc di Ladins

L recort de chi momenc de acà 40 egn é amò vives te chi che li à vivui en pruma persona. Anter chisc l é ence fascegn, chi che con la Crousc Checena o coi Studafech o con autres gropes de didament é jic a Tieser per portèr aiut e confort.

En sabeda passèda fora Tieser l era ence n grop de set volontadives de la Crousc Checena de Fascia e Fiema che era a Tieser ence acà 40 egn: Gilberto Bonani, Valerio Lorenz, Claudio Merighi, Mauro Murer, Mauro Pederiva, Francesco Pollam e Luciana Detomas.

»Aon volù jir fora duc chenc ensema – ne à contà Luciana Detomas. L é stat na dì che ne à soscedà de gran emozion, i recorc de acà 40 egn é endò vegnui al luster, ence enstadì l é stat na esperienza n muie forta. Gio enlouta aee 26 egn, ere te la Crousc Checena da 3 egn, l era de vender e via per l dì lurae te Istitut Cultural Ladin. I ne à chiamà dalmesdì a ne dir che l era crepà na diga fora Tieser, no podaane se fegurar, no capiane nience de che che se trataa. Da sera son jita te senta de la Crousc Checena sa Vich e son jita fora con la pruma ambulanza che pontaa via. Son stata fora a Lago de Tieser passa n meis, ensema a n muie de autra jent, ence Studafech.

De più su La Usc stampèda de en vender ai 25 de messèl del 2025.  (Monica Cigolla)