La Usc di Ladins

Temp de Covid, temp de neva modalitèdes. En mèrtesc ai 20 de oril l’é stat la radunanza generèla de la Familia Coprativa de Cianacei che se à dejout da les 11 dadoman a na vida più serèda che zenza per schivèr problemes de contage, con na riunion anter l president Giorgio Debertol, l diretor Gianluca Daberto e l’avocata Benedeta Bresadola, e zenza che i sozi vegne chiamé ite te sala duc ensema. A duc é stat dat a ogne vida l met de uzèr fora sia ousc, de gra a la documentazion data fora te la setemènes inant de l’assemblea e retuda compilèda te ufize a l’atenzion del raprejentant designà avocat Benedetta Bresadola che se à cruzià de la analisèr. 189 l total de la bustes en costion, con na dejina de schedes no bones e donca n total de 179 sozi che à lità per l’erogazion di ristorni, l’aproazion del bilanz ai 30 de setember 2020 e la litazion de la encèries sozièles.

L bilanz à fat segnèr n utol de passa 200 mile euro

N an sessaben nia sorì a cauja de la pandemia che à condizionà la vita de duc chenc e rebassà trop l turism, ma chest no é resultà catastrofich ti numeres. Più che bon defat l resultat economich e finanzièr enceben n lijier arbassament de la vendites: te l’ejercizie 2019/2020 defat la vendites é calèdes del 4% ruan a 4.506.750,00 (respet ai 4.694.691,00 del bilanz passà), e chest con na maor dificoltà te la senta de Cianacei (rebas del 4,05%) che te la filiala de Dèlba (rebas del 0,93%). Dut somà aboncont, coche se dijea, la bona gestion à dat l met ence te chest an de pandemia de aer istesc n utol de ejercizie de 201.126,00 euro. L bilanz l’é stat aproà con 168 stimes a favor.

De più su La Usc stampèda de en vender ai 30 de oril del 2021.  (Daniele Verra)