La Usc di Ladins

Chest an l’Istitut Cultural Ladin »majon di fascegn« zelebrea i 40 egn de la Biblioteca dedichèda a Pare Frumenzio Ghetta e i 20 egn del Museo ladin.

I festejamenc per la biblioteca é taché ite con la bela scomenzadiva del contest »Canori-Piccoliori« dedicà a Ermanno Zanoner, più cognosciù co l’inom d’èrt de Luigi Canori e sia sor Veronica Zanoner Piccoliori. N contest che se à serà sù ai 31 de mèrz con na direta streaming endrezèda da l’Istitut per rengrazièr i partezipanc che é stac dalbon n muie, joegn e manco joegn, che à volù recordèr i doi artisć tras na esprescion artistica o tras n coment te n video. A la direta, che se pel amò veder su la piata Facebook de l’ICL, à tout pèrt ence Veronica Zanoner con so fi Giuliano Piccoliori che à abù paroles fones de rengraziament e aprijiament per chesta scomenzadiva, che à didà a cognoscer miec i doi frèdes da Moena e i segnes che i à lascià.

»Aon abù n gran suzes – à dit la responsabola de la biblioteca Alberta Rossi - n muie de jent à manà ite video e i à abù gran gust de tor pèrt. Soraldut l’é stat bel cognoscer Veronica Zanoner e soe opere artistiche, chèdres de gran valor che merita de vegnir valorisé e per chest l’é stat proponet de endrezèr na mostra che vegnarà fat bonamenter più inant.«

Mia majon, mia storia, mia parlèda

La paroles cernudes per fèr da leitmotif a chest an de festejamenc l’é »Mia majon, mia storia, mia parlèda«, paroles che vel esser na declarazion de amor per noscia identità ladina e che ressumea i propojic de la neva direzion che per i egn che vegn la é te man de la diretora Sabrina Rasom: »Te chesta sentes istituzionèles, te chesta majon, luron per stravardèr n melaur prezious – à dit la diretora Rasom. Noscia storia à reijes fones tel passà, ma la é averta al davegnir. Sion stolc de noscia parlèda amò viva e gaerta, compagna de la vita da duc i dis. Volon che nosc esser ladins seghite a jerveèr. Per chest la cultura jirà fora per la strèdes. Ge sporjaron a duc l saer prezious de egn de lurier, per tor ite la jent e soscedèr la gaissa de esser ladins.

De più su La Usc stampèda de en vender ai 7 de mé del 2021.  (Monica Cigolla)