La Usc di Ladins

La ladina Katia Vasselai, la mochena Chiara Pallaoro e l cimbro Matteo Nicolussi Castellan l’é i neves componenc de l’Autorità per la mendranzes linguistiches. I é stac nominé en lunesc passà ai 10 de mé dal president de Consei provinzièl Walter Kaswalder. La nomina de l’Autorità, perveduda a l’art. 10 de la lege provinzièla nr 6 dai 19 de jugn del 2008 su la mendranzes linguistiches, cogn vegnir fata dal Consei provinzièl con amancol i 2/3 de la stimes. Ampò tel Consei dai 20 de oril, canche l’era stat tout dant la nomina, no l’era stat arjont chest quorum, ajache duc i conseieres de mendranza no era d’acort e i aea dezidù de no litèr. Dachelanvia l’encèria de nominèr é jita al president del Consei che tel cerner i trei raprejentanc l ge é jit dò ai criteries metui dant da la Conferenza di capigropes consilières scutan sù i trei teritories enteressé e sia esperescions istituzionèles. I trei neves componenc à mandat per 7 egn e i tol l post de Dario Pallaoro, Luciana Rasom e Giada Nicolussi.  

 (MCI)