La Usc di Ladins

Dassen bon ejit l’à arjont la scomenzadiva ‘Per mia Tera’ de Marti Cigolla e Guido Trevisan. Fora per l meis de mèrz apontin l’é stat endrezà trei scontrèdes virtuèles te cheles che à tout pèrt en media cincanta persones per outa. L spazie à ospità persones e imprenditores con desvaliva esperienzes e idees e chel che l’é nasciù l’é stat n lech de confront e de scambie ence con i partezipanc. Ti encontres la singola persones no rejonèa per la aziendes o la firmes che les raprejenta, ma demò per eles enstesses. Te chesta pruma lingia de scontrèdes se à rejonà de turism, respet de l’ambient e Marmolèda. Ades fora per l’istà l team de ‘Per mia Tera’ l’é cresciù e i é jà trei i encontres en program. L’obietif, con na lingia de argomenc smaorèda, l’é chel, apede a ge dèr lèrga semper a la ousc de la jent, de portèr dant soluzions concretes a costions ence ‘ferses’ de noscia Val.

Aon domanà fora Armando Loss, Christopher Bernard e Bruna Talmon, trei partezipanc de età e esperienzes desvalives che à tout pèrt con atenzion a duta trei la pruma scontrèdes, che che i n peissa de chesta scomenzadiva.

L bel de chest spazie l’é che...

Armando: L bel de chest spazie l’é che se pel se enscinuèr e tor pèrt, se confrontan con autres partezipanc, portan dant le esperienze che se à. Soraldut se à podù scutar opinion e soluzion de autra jent, ence n muie desvalive. Tras l debatit con chi che à tout part, con età e esperienza desferente, se à metù en discuscion chel che fosc de tenc aon dat semper per consolidà. Vegn tout ite dantdaldut le persone: ge vel emparar a scutar opinion desferente e ence en contrast. Ousc che vegn dal bas e che chi de la politica, i dirigenc e i imprenditores valch outa i scouta pech. ‘Per mia Tera’ l’é n spazie utol per poder rejonar e dar n contribut.

Christopher: ‘Per mia Tera’ l’é n spazie n muie enteressant, te chel che se à spartì idees e rejonà de tematiches che revèrda mia ‘cèsa’, noscia bela val. ‘Cèsa’ ajache l’é l post olache vive, che beleche l conscidree, con gelojìa, l post più bel del mond. Duta la scontrèdes les é states aprijièdes da tanta jent, che vegn da realtà de lurier e sozièles n muie desvalives anter de eles. Chest me fèsc piajer, ajache sente che zeche l’é dò a se mever e che se é dò a tor consaputa che besegna cambièr o renovèr per restèr al pas coi tempes.

Bruna: L’idea de ‘Per mia Tera’ l’era se conzentrèr su l’ambient te noscia Val. Canche se rejona de ‘stavardament del teritorie’ ge vel ampò partir ence da la più picola problematiches, dai èlbres che sauta jabas, ai sasc che vegn ju dai mures.

Duta l'intervista su La Usc stampèda de en vender ai 4 de jugn del 2021.  (Nicoletta Riz)