La Usc di Ladins

Se à serà sù chisc dis passé la regoeta de magnadiva endrezèda da la Scola Ladina de Fascia en colaborazion con l’Operazione Mato Grosso. Ajache i studenc pel jir a scola demò al 50% de l’orarie tradizionèl, chest an la regoeta é stata sperlongèda per doi setemènes tel meis de mé per consentir che duc posse tor pèrt a la scomenzadiva. Da la scola populèra fin ai licees duc à sostegnù con gaissa la regoeta. L’é stat coscita regoet 15 quintai de roba da magnèr, la maor pèrt de la roba é jà stata ciarièda sui camion che é ponté via per l Perù olache la vegnarà spartida fora anter la miscions gestides dai volontadives de l’Operazione Mato Grosso. Vèlch scatolon enveze con ite roba da magnèr a curt termen é stat consegnà al grop de Fascia Solidala che ogne setemèna l regoi e l dèsc fora roba a la families del post che à de besegn.

Apede a farina, zucher, pasta, ris, elech, bossoi e cocoi de autra roba da magnèr, chest an per la pruma outa l’é stat regoet ence panejìe, bens de prum besegn ma che a la femenes ge costa trop. I panejìe regoec i é stac consegné ai Servijes Sozièi del Comun general de Fascia che se cruziarà de ge i dèr fora a la categorìes che più à de besegn de la val. 

I volontadives de l’Operazione Mato Grosso e chi che à endrezà vel ge sporjer n fort develpai a duc i bec, joegn e families che à didà te la regoeta e che deida fora co sie sostegn concret la jent che se troa te la stentes.