La Usc di Ladins

L é passà oramai 40 egn da canche Armando Rebaudo e Mario Färber i à dat vita a Moena al grop »Le Lingue Morte«. Dut era nasciù beleche per sgherz, ajache l Färber sonèa ti Marascogn, grop ‘serio’ che volea valorisèr la poejia e la musega ladina e se prejentèa en mondura, e Armando Rebaudo à pissà de fèr con el na ‘resposta’ provocatoria e feruscola a chest grop. Col test del Rebaudo e la musega del Färber l é nasciù la pruma cianties »Revoluzion« e »Che bele ciasete«, dapò i à binà ensema vèlch auter sonador e del 1982 i à fat l ‘storich’ conzert te Comun de Moena, olache i ge dajea 100 lires a duc chi che jia a i scutèr.

Del 1983 i à dat fora la pruma veta, fata en cèsa, dal titol »Nontiscordardimè«, ma nesciugn aessa dit che coi doi fondadores enciasé fora per la Germania chest grop posse aer na vita longia, enveze...

Con sie stil fora de anter, la gran ironia e prejenza scenica da cabaret del Armando e la braura desche musizist del Färber, tolan ite tel temp musizisć e compagnes de strèda desferenc, Le Lingue Morte les é ruèdes al Ladiniatour se fajan cognoscer e aprijièr te dut l raion ladin e dapò les é jites inant con n muie de produzions, ence video, enscin ades.

Canche i vegnia ite da la Germania e i jia sonèr a La Grenz, l local se empienia fit e toch de jent. L an passà i à fat n nef CD, »Ensema« e con duc i empedimenc del covid i à cognù spetèr enscin enstadì per poder l portèr dant. A La Grenz l é stat endrezà no demò un ma doi conzerc, ai 16 e ai 17 de otober, per ge dèr l met a più jent de poder ite, e duta doi la outes i posć a la leta i é stac duc ocupé.

De più su La Usc de en vender ai 22 de otober del 2021.  (Lucia Gross)