La Usc di Ladins

No l é sorì spiegar a parole l gordeon de emozion che à soscedà l conzert de la Musega da Vich. En sabeda ai 13 de november la comunanza de Fascia no à volù menciar al apuntament con la Banda e l teater de Navalge se à empienì ras e toch, na ocajion rara soraldut te chisc ultimes tempes, per la prejentazion del nef CD »alfa & omega«.

L fil trat tel temp à tacà a se desmenar ju pontan via dal 1820, an de fondazion de la Banda, per tociar i momenc più segnificatives: la vera, l an 1969 canche tel grop à podù jir ite le prume doi femene Anna Ghetta e Flora Oberthaler, l recort de n maester se n jit massa prest, l passà e l davegnir.

Tassie de n soul mosaich

Dal zenter de la sala l é pontà via l viac e tel zenter de la sala l se à serà su, con l ultim tassel che à completà sul vidrel l logo studià fora per i 200 egn e con la musega del bis domanà a gran ousc.

N mosaich componù da desvalives talenc. Chel musical de duc i componenc de la Banda e en particolar de Fabio Riz e Marco Mattia che à scrit doi toc neves per chesta ocajion e di maestres Paolo Rasom e Roberto Silvagni per soa ejibizion; chel teatral coi musizisć/atores Franco, Giuliano, Stefano, Simone, Alessia, Ivan e Sebastian, Serena e Lara, Nicola, Giovanni e l picol Emil; chel di prejentadores Daniela e Alex che à fat aprijiar fora per fora l son de nosc bel lengaz fascian; chel del grop de endrez con Daniela, Alex, Serena, Lara e Valentina.

Tassie, ogneun te soa part, che ensema à didà a compor l mosaich sot la man e la vida segura del maester Alessandro Ghetta. L’emozion, la responsabilità e l empegn de vidar la Musega te chesta ocajion tedant a n publich scì gran, se i à sentui più che n’outa te la ousc de Alessandro che à sapù rejer dut cant con gran profescionalità. »Per far grop ge vel esser n grop« l à dit l maester, rengrazian duc chenc e le femene ence con na resa.

De più su La Usc de en vender ai 19 de november del 2021.  (Monica Cigolla)