La Usc di Ladins

Conjobièr musega e teater e tor ite soraldut i bec. A ic l é out defat l nef cors coletif per emparèr a ciantèr e fèr teater, descheche perveit la Lirica, che la Sociazion »Le Muse e le Dolomiti« é stata bona de endrezèr ence te Fascia e più avisa a Moena. 

Chest an 2022 l é an emportant per la Sociazion, pont de referiment per la musega classica te la Dolomites, ajache la festeja 10 egn de atività. E per chest travert l à pissà de portèr ence te Fascia e Fiem l cors per bec che à più che 6 egn, che l an passà l era stat tegnù te doi sentes a Ègort e a Valada Agordina. La maestra del cors l é Oda Zoe Hochscheid, mezsopran, che per 13 egn é stata dozenta e diretora artistica del Cor oujes biences de Amsterdam, na ezelenza te l’Europa, doventà famous en ocajion de la encoronazion del re Willem-Alexander. Ada Zoe ades la stèsc te la Dolomites e l é la presidenta de la Sociazion »Le Muse e le Dolomiti«. 

L obietif de la sociazion l é valorisèr l teritorie de la Dolomites travers l'èrt de la musega e per chest la endreza conzerc ma ence corsc. N cors per bec tegnù da la maestra Oda Zoe Hochscheid vegn metù a jir ades ence a Moena.
Per maor informazions se pel jir tel sito internet www.musedolomiti.it opura contatèr la conseiera per l Trentin Angela Chiocchetti al 340 2353361.

La Sociazion »Le Muse e le Dolomiti« la é do che la enjigna la rassegna de conzerc da d’istà con apuntamenc de auta calità per festejèr i 10 egn de atività.

De più su La Usc stampèda de vender ai 25 de mèrz.  (mci)