La Usc di Ladins

Nce Luke Moncada, che se ova fat mel, fova n sada inò njenià per jì sun dlacia. Nscila ova l trainadëur dl Hc Gherdëina Teppo Kivelä a despusizion duc i jugadëures per chësta ndesfida de n sada sëira contra l Maran tl Pranives. L'ultima partida contra chësta scuadra, de setëmber a Maran, ova l Gherdëina perdù. Chëst iede, dan a passa 650 fans, à l Gherdëina pudù festejé.

L Gherdëina à scumencià bën l juech, tucan bele do cater menuc la porta cun Luke Moncada per l 1 a 0. I averseres fosc y blanc ie mo tl prim tëmp stac boni de valivé ora l juech, fajan l 1 a 1. Al 26ejim menut ie l Gherdëina inò stat bon de tuché cun Adam Brady, ma la legrëza per vester danora ne n'à nia durà giut. Tosc do à ënghe l Maran fat n gol, la stajova 2 a 2. Ma la ne fova mo nia fineda, mo n iede à Stephan Deluca purtà inant l Gherdëina sun l 3 a 2 y mo n iede ie l Maran stat bon de valivé ora l juech fajan l 3 a 3.

Nscila fòvel mo da jughé i tëmps suplementeres. Granda fova la legrëza tl Pranives, canche Carmine Buono ie stat bon de tré ite l puch tla porta di averseres. Finalmënter ti iela jita fata al Gherdëina: doi ponc y na vënta sfadiëusa, ma dessegur meriteda.

Duman merdi, furnea chëi de Gherdëina via n Ampëz per l derby ladin.

USC