La Usc di Ladins

I se à mingol slongià i tempes de consegna del frabicat P.P. edd. 227-228/1CC Vich, la Ciasa de la Moniaria de Sèn Jan. L Comun General, patron de la cèsa, aea pervedù che se posse ite con chesta aisciuda, ma per via de sospenjions di lurieres per costions burocratiches e de intervenc de restaure, la sarà vertia per chest uton.

I lurieres per l recuperament de la strutura era stac finanzié con la delibera nr 7 dai 8 de mé del 2019 da la Jonta Regionèla con l’indicazion e l vincol spezifich de ge dèr neva valuta al segnificat di lesc identitères di Ladins de Fascia col valorisèr e col ge dèr lèrga a desvaliva ativitèdes per la defendura e la valorisazion de la cultura ladina.

De november del 2019 l projet é stat apaltà a la firma Tecnobase s.r.l. de Trent per na soma de € 1.257.026,61, de chisc € 72.432,36 per oneres che revèrda la segureza e somes a desposizion.

La direzion di lurieres e la contabilità ge é states dates su al architet Marco Giovanazzi e l’encèria de coordenador per la segureza endèna l’esecuzion al enjegner Fabio Ganz.

L intervent l vegn polito – à dit l Conseier de procura a la infrastrutures del Comun General Carlo Ganz – i laores i va inant, se sà che i tempes de le opere publiche i é n mulge lonc ma segur per chest uton se podarà int. 
L projet l é n mix anter l mantegniment de la tipologia originaria – à spiegà amò Ganz – con siöi particolares e struture interne e al medemo temp na realisazion n mulge moderna de valch part che la é stata desterminada dal besogn de meter a norma la strutura dal pont de veduda anti sismich e per la adatar a le normative per i pedimenté, ajache se trata de na strutura publica.

De più con desvaliva fotografies su La Usc stampèda de vender prum de oril.   (Monica Cigolla)