La Usc di Ladins

L era sodesfazion ti eies de Fabio Chiocchetti en domenia ai 3 de oril, a la fin de la prejentazion del liber »Canori. Scric, poesìe e cianzon«; legreza a veder che l publich che aea empienì l teater del oratorie de Moena se n jia content, a sentir i comenc de stima e de marevea per l ecletich autor del Gabana, registrà te sie comun col inom de Ermanno Zanoner (1907-1991).

Desche do chela festa che l Comun de Moena, col Istitut Cultural e l Grop ladin, ge aea fat al Canori del 1981. L’era stat n recognosciment de so valor do egn senestres per chest autor pech conscidrà da sia jent, che ge aea dat la gaissa per poder amò meter ensema scric e musega preziousc.

Da enlouta, per passa 40 egn, Fabio Chiocchetti à seghità a rencurèr la produzion del Canori, daite e de fora dal Istitut Ladin, tolan su desche na sort de ritajon la paroles del Canori: »Per far del ben a ’n anima / el miec che se pol far / l’é de fenir sòva òpera / seghitan a ben far.«

Do aer valorisà soraldut la composizions de musega e dapò i retrac, col didament prezious del nez del Canori e archivist al MART, Federico Zanoner, ades con »Canori. Scric, poesìe e cianzon« se à jontà n auter tassel prezious per la cultura ladina e per la comunanza de Moena e de Fascia, na conferma del valor del Canori desche fontèna de èrt, letradura e cultura a 360°.

Chest valor é stat uzà fora te passa doi ores de prejentazion de la neva publicazion, ores che é passèdes via coran anter paroles dal vif, proiezion de scric e dessegnes, registrazions de la ousc originèla del autor e de sia cianties, reinterpretèdes da cores e musizisć de stii desferenc, dal jazz a la lirica, palesan n aprijiament che va sorafora sie paisc e sia val e che rua te desvalives ambienc artistics.

Compagné da Anna Mazzel, Fabio Chiocchetti e Federico Zanoner se à enterzà portan dant recorc, analises, spiegazions e curiositèdes su la vita del Ermano del Gabana, ma soraldut su la produzion desmesurèda de Luigi Canori, che à tout ite ogne sort de esprescion e de argoment.

Dut l articol su La Usc stampèda de vender ai 8 de oril.   (Lucia Gross)