No l é na dì, te chesta sajon da d’istà, che no ne rue la burta neva de n azident sa mont che à domanà l intervent di socoridores. Ogne dì l é volontadives del Socors da Mont che cogn lascèr su sie lurier e sia jent per jir a chierir de portèr a salvament zachei che sun nesc crepes i é en pericol, o magari ence jent che zenza ferstont é jita sa mont zenza ensser enjignèda e atrezèda descheche ge volessa.
L é passà 70 egn da canche del 1952, do l cruzie per n grief azident sozedù sul Brenta, l é nasciù l Socors da Mont e Speleologich del Trentin, na organisazion struturèda de didament sui crepes che dapò se à slarià fora te dut l Trentin e te duta la Tèlia. A chesta vida enlouta l é stat istituzionalisà na forma de solidarietà che à semper caraterisà nesc raions da mont, e che tel temp la é doventèda semper più preziousa.
Per zelebrèr i 70 egn da chel moment emportant l é stat endrezà anter l auter n bel regoi de retrac e descrizions che vegn portà fora per desvalives lesc de la provinzia. Do esser stata metuda fora ence a Cianacei, ai 29 de aost la esposizion rua a Moena, tel picol Piaz de le Perle Alpine vejina al Comun, e apontin te chesta ocajion en lunesc da les 5 domesdì te la scoles de Moena vegn prejentà la Stazion de Socors da mont de Moena, vidèda anchecondì da Thomas Zanoner e mingol de storia di socoridores de angern e de anché.
De più su La Usc stampèda de vender ai 26 de aost. (Lucia Gross)
70 egn de Socors da Mont: preparazion e solidarietà
La competenza e l empegn prezious di »agnoi de la mont« vegn prejenté a la jent en ocajion del cedean te desvalives lesc del Trentin. En lunesc a Moena.
Galaria retrac
View the embedded image gallery online at:
https://www.lausc.it/valedes-ladines/fascia/20745-70-egn-de-socors-da-mont-preparazion-e-solidarieta#sigProId3d9e6786b1
https://www.lausc.it/valedes-ladines/fascia/20745-70-egn-de-socors-da-mont-preparazion-e-solidarieta#sigProId3d9e6786b1