La Usc di Ladins

L é stat l grop de I Bontemponi a orir la rassegna de teater ladin del Comun General de Fascia. Doi spetacoi, en vender ai 18 de november e en domenia ai 20 domesdì che à empienì fit e toch tant l chino de Cianacei che l tendon de Poza. Dalbon n suzes per la compagnia che à portà sun paladina n toch de Loredana Cont dal titol »I più bie regai no se i fasc ite mai« con la regia de David Dorich. 

La rassegna de teater nasciuda del 2018 con chela de binèr ensema ogne doi egn i spetacoi di desvalives gropes de teater de la val, del 2020 é sutèda per la pandemia e coscita chest an la era spetèda con gran gaissa e curiosità. La jent à estro de jir a comedia, de se goder, de se passèr vèlch ora deletegola zenza pensieres. 

Do I Bontemponi l é La Mizacoles a jir en scena col toch »La tradida dessenèda« con la regia de Loreta Florian. L prum spetacol de La Mizacoles l é stat en jebia ai 24 te Oratorie de Moena, chi che se l aessa perdù pel jir a l veder amò chesta domenia ai 27 de november da les trei domesdì te teater de Ciampedel. Dapò ai 2 e ai 4 de dezember sarà protagonisć i Amisc del Teater e ai 16 e 18 de dezember podaron se goder col grop de teater Antermoia. No ve lascià sciampèr chisc apuntamenc de teater ladin del Comun General de Fascia.

De più su La Usc stampèda de vender ai 25 de november.  (Monica Cigolla)