La Usc di Ladins

La posizion di aministradores fascegn en cont del davegnir del ospedèl de Fiem era jà stata palesèda a na vida belebon chièra te la scontrèda informativa che la Provinzia aea endrezà ai 20 de firé te Fascia, ma ades la é ofizièla. L Consei General se à binà ai 16 de mèrz te na curta scontrèda en videoconferenza e l à aproà na mozion portèda dant adum da duc 3 i capigrop del Consei: Francesco Gabrielli per ‘Cordanza’, Matteo Iori per ‘Fassa’ e Alessandro Bernard per l ‘Grop Misto’.

La mozion é nasciuda aldò de na letra de la Provinzia, che ge à dat l met ence al Comun General e ai aministradores fascegn de tor sia posizion en cont de la dezijion se fèr n nef ospedèl o restruturèr chel ‘storich’ a Ciavaleis. Acioche chesta posizion posse aer maor forza l é stat pissà de la fèr aproèr da dut l Consei General: l vizeprocurador Renato Nazario Micheluzzi à enjignà l test che dapò l capogrop del grop de maoranza ‘Cordanza’ Francesco Gabrielli à tout dant te na scontrèda di capigrop per ruèr a na formulazion condividuda, che é stata sotescrita da duc trei.

De più su La Usc stampèda de vender ai 17 de mèrz.  (Lucia Gross)