La Usc di Ladins

»Volon ve far descorir na storia desvaliva, olache la desabilità l é demò una de le tante carateristiche de ogne sogetività. No volon ve contar nosce cartele cliniche, ma coche l é la vita soziala dal pont de veduda de doi touse con desabilità. La desabilità l é l resultat de na relazion falada anter noi e l mondo olache vivon. Volon proar a cambiar chela relazion, ensema. Anché cognon proar a n far su una che la sie dalbon inclusiva.«

Chest l é n toch de la pruma part del liber de Claudia Maltese e Gresa Fazliu dal titol »Deco-struzione anti-abilista« scrit per la ciasa editora Eris, che é stat prejentà ence a la fiera del liber de Torin. Travers soe esperienze personale, storie e analisi, le doi autore met al luster l’esperienza dì per dì de le persone con pedimenc e le propon na reflescion critica sul besegn de n mudament de la sozietà. L é na narazion che te ciapa ite, che te porta a lejer e pissar sora, e a la fin ruar a la conclujion che dalbon la sozietà à amò n lonch percors da far per esser dalbon inclusiva.

Dant da dut, podede ne dir vèlch de Vo?

Son Gresa, vegne dal Kosovo ma son cresciuda a Moena. Son del ’92. Son laureada en soziologia e ades stae a Bologna olache son do che fenisce miöi studies al Dams.

Co éi stac i egn canche eraade beza e dapò joena?

I primes egn i é stac normai. Mia familia no me à mai tratà a na vida desvaliva da miöi fradiè, la me à semper engaissà a creser te me enstessa e te miöi ensomesc. Da picola, no pode near che l era senester me far amisc. L é stat a scola che è entenù che che völ dir aer na desabilità. La joeneza la é stata senestra per chesta rejon, è tacà a descorir che per la sozietà dant de esser na joena e bon, ere na joena con desabilità. Chest l é mudà mingol a le scole aute e dapò a l’università. Te chest ambient è troà più avertura mentala.

Can éla nasciuda l’idea de scriver n liber? Él stat n besegn?

L’idea de scriver chest liber é nasciuda via per l uton passà a rejonar con la ciasa editora. Ic sentia l besogn de aer n liber che rejone de chisc argomenc e noi (gé e Claudia) aane l besogn de contar.

Duta l'intervista su La Usc de papier de en vender ai 16 de jugn del 2023.

 (Monica Cigolla)