La Usc di Ladins

Con l’ocajion de la festa per i neves mesi di studafech stata ai 24 de setember, l dì dant se à binà via Vac i studafech di Distrec de Fascia, Fiem, Primier e Valsugana, che é stac envié per ge dir n gran develpai. 

L Ispetor del Distret de Fascia Alessandro Pellegrin à volù ge palesèr l fon rengraziament per l gran didament che i ge à sport a noscia comunanza l an passà, do la metes di 5 de aost, canche ben 407 studafech da chisc cater Distrec con sia prejenza, sie lurier e sie empegn te pech temp i à librà da l’èga e da la mauta la val piena de ghesć tel pien de la sajon da d’istà.

Do aer fat na bela foto duc adum tel piaz, ajache l temp era malsegur duc é jic tel tendon enjignà per l’ocajion, olache per doi dis col didament de desvaliva sociazions e volontadives l é stat endrezà dut bel e bon da magnèr e beiver, fèr festa, scutèr musega, balèr e se goder.

Te tendon l era ence i studafech de la Croazia, che à na fradaa con chi de Poza e de Cianacei e i é stac saludé dal comandant de Poza Andrea Winterle. A portèr sia paroles de develpai l é stat dapò la Conseiera de procura al volontariat del Comun General, Mirella Florian, che à recordà con emozion canche Ispetor del Distret de Fascia l era sie père Otto e la ge à fat i complimenc ai volontadives per sie empegn no demò ti intervenc de socors ma ence per portèr inant de generazion en generazion i valores del se dèr ju per i etres. L ombolt de Sèn Jan à recordà l doer di aministradores de ressolver la situazions encompres desche chela sozeduda apontin ai 5 de aost del 2022, e coche apontin per chest la prejenza di Studafech sie semper na segureza, e l à fenì con la paroles: »Aon besegn de voi!«

De più su La Usc stampèda de vender ai 29 de setember.  (Lucia Gross)