La Usc di Ladins

Sides d’invern co d’isté y sot a vigni tëmp les vëigon passan: les panda blances cun la rissa ghela. Al é les colaboradësses dl sorvisc d’assistënza a ciasa, che vá fora por les ciases y röia ince tles viles plü dainciará dai zëntri di paisc de valada. Ëres porta assistënza y cura ala jënt atempada y nia, mo dantadöt alisirëieres y acompagna cun so laur i familiars. Chësc sorvisc che n’é oramai nia plü da ponsé demez, complësc tla Val Badia 35 agn. 

A alzé fora le sorvisc, le personal sozio­-sanitar y i volontars che cun impëgn y dediziun laora de por de por la cura dla jënt atempada, á ponsé l’Uniun Seniors San Martin-Antermëia, che á cun na festa orü rengrazié y alzé fora chëstes figöres da defora gonot püch visibles y che laora plücoater tl chît, ascognüdes danter i mürs de ciasa.
Porchël él gnü en sabeda, ai 6 de setëmber, daimpró al Ciastel de Tor recordé l’evoluziun de chësc sorvisc y mëtü dancá les figöres che á cun bona orenté y na seta d’idealism surantut por prömes les inciaries por jí danfora.

Ombolc y assessurs comunai y provinziai, sciöche ince surastanc y responsabli dl Raiun sozial y sanitar Val Badia, é rová adalerch por festejé deboriada ai colaboradus i iubileums desvalís: dlungia al iubilé de 35 agn dl Sorvisc de assistënza a ciasa y dl Sorvisc sozio-pedagogich de basa, él gnü festejé chël de 50 agn dl Sor­visc de assistënza finanziara y chël de 37 agn dl Sorvisc infermieristich.


Deplü da lí ciafëise tla ediziun nöia da incö, vëndres ai 12 de setëmber!