La Usc di Ladins

Dai 13 ai 26 de otober sie componenc del grop Bela Ladinia é jic a fèr n trekking te la Patagonia. I é jic tel parch nazional Torres del Paine e te chel de Los Glaciares olache se troa l Perito Moreno, l soul giacé stabol del mond che se pert e se recupera. Dis e dis a pe, con si colec dal color pomaranc sgalizent, passan dal vert, a la crepa e la giacia, te posć maraveousc. De chest trekking ne conta Luca Zulian e Pierpaolo Trottner.

Olà siede rué con vosc trekking?

Luca Zulian Sion stac trei dis tel parch nazional Torres del Paine che l é na zona stravardada del Cile e sion jic su le torn del Paine, le é beliscime, le ge somea mingol a le trei cime de Lavaredo. Te chest parch l é demò troes e trei refuges. L é stat declarà Resserva de la Biosfera da l’Unesco e l é conscidrà l’otava marevea del mond. A la fin del parch aon fat l trasferiment col batel fin a Puerto Natales olache aane prenotà n alberch. Do trei dis de trekking te chest parch del Cile sion jic deretorn a El Calafate e da chiò sion jic a veder l Perito Moreno, l giacé più cognosciù tel mond, declarà Patrimonie de l’Unesco. Sunsom a 1.500/2.000 metres l fioca a do a do, i ne à dit che l fioca 300 dis al an, chesta neif la se schicia e pian pian la vegn ju e la sauta tel lach, desche iceberg. A far dut l viac la ge met 400 egn, noi aon vedù sutar ju n toch de giacia che se aea fat del 1623.

Pierpaolo Trottner Chiò aon tout la guida che ne à dat le carpele e la ne à menà proprio sui bloches giacé.

Aede vedù ence autra marevees de la Patagonia?

Pierpaolo Sion jic ju te la zona de El Chalten, n bel paisc con le ciase basse, bares e pub, descheche l era chiò acà 60 egn. Da aló sion ponté demez per autre doi gite. L prum dì sion jic al Fitz Roy e l secondo dì al Cerro Torre, i doi monc più cognosciui de le Ande de la Patagonia.

Duta l'intervista su La Usc stampèda de en vender ai 17 de november del 2023  (Monica Cigolla)