La Usc di Ladins

Aldò del debatit amò avert su la costion de la demiscions de Andrea Weiss da sia encèria de President de la Sozietà Gregn Evenc de Fascia, testimonià da la letra vegnuda fora su La Usc stampèda de en vender ai 17 de november, i consorzies de impianc portamont Val de Fascia/Ciareja e Lujia/Sèn Pelegrin ge à manà a la redazion na nota stampa per spieghèr sia posizion e fèr vèlch prezisazion ajache, i scrif »a ic ge é stat dat su a tort la responsabilità de chel che l é sozedù.«

»Te chesta ultima setemènes - vegn scrit te la nosta stampa - l é stat dit che i doi consorzies de impianc portamont aessa palesà ‘a paroles’ la sfiduzia ti confronc de Andrea Weiss, tras la respetiva raprejentantes Elisa Maccagni e Alice Dellantonio, col retegnir Weiss no politicamenter alineà a la volontèdes di consorzies medemi, ajache l se aea schierà politicamenter con la lista aversaria a chela che aea vent la ultima litazions provinzièles.

No l é stat nesciuna mozion ofizièla de sfiduzia ti confronc de Weiss e manco che manco nesciun diktat, descheche vegn scrit te la letra publichèda su La Usc, ma demò n debatit daite di consorzies su la oportunità che l President del ent tanche metù su ‘Val de Fascia Gregn Evenc’ prejentasse sia candidatura politica a la provinzièles. Da semper i doi consorzies se empegna a no condizionèr la sceltes politiches del teritorie, schivan de se meter dant politicamenter. N comportament logich e doverous, condividù anter noscia organisazions e sun chest la ultima litazions no à fat ezezion. Se aon piutost interogà, proprio aldò de chest prinzip, se fossa stat adatà che l President del nef ent metù su portasse dant sia candidatura politica a la provinzièles. N interogatif, va prezisà, vegnù fora dant del spolie de la zedoles e donca deldut no coleà al ejit finèl de la litazions. Per chesta rejon n l é azetabol che ai consorzies ge vegne dat color politich e nience ‘deferenza’ envers i venjidores de la litazions.

La demiscions de Andrea Weiss é states personèles, volontères e definitives, no leèdes a forzadures o discriminazions ma madurèdes sun oujes reportèdes de chisc rejonamenc che aessa cognù restèr daite di consees de aministrazion. Demò na eventuèla touta de posizion de na mozion de sfiduzia, che dijon amò n’outa, no la é stata, aessa podù fèr madurèr la demiscions. L é donca evident che chesta no l era noscia intenzion« - vegn scrit te la nota stampa.

La posizion completa di doi consorzies é da poder lejer su La Usc stampèda de en vender ai 24 de november del 2023  (Monica Cigolla)