La Usc di Ladins

Tel program de anché, sabeda ai 30 de dezember Massimiliano Ossini pea via da la Marmolèda per ge fèr i augures de bon an 2024 a duc chi che vèrda “Linea Bianca”. La ripreses é states fates chisc dis passé, en colaborazion con l’APT de Fascia e Trentino Marketing, per poder meter te vedrina i panorames più bie, i lesc più atratives e la carateristiches più curiouses.

Su la Reina de la Dolomites Ossini, apede che dal colega Lino Zani, l é stat compagnà da la pruma menacrep femena, la fascèna Marika Favé e dapò l se à troà con Carlo Budel e Aurelio Soraruf, gestor e patron de la Capanna Punta Penia.

Tel cors de la trasmiscion sarà l met de cognoscer ence la boschiera Francesca Locatin e l espert de bosch Roberto Bruni, ma no menciarà ben segur la raides coi schi: i maestres de la Scola de schi Marmolèda de Cianacei vidarà l condutor a fèr slalom su la neif del Ciampac.

Do l schi, a Soraga sarà l met de veder i ciavai norics e de cognoscer Paolo Brunel del Agritur Malga Pié, e amò la Polizia de Moena mosciarà sia atività, no demò sui portoes ma ence del sozièl e te paisc. Se podarà veder Moena sgalizenta col marcià da Nadèl, e ence cognoscer, col pistor Maurizio Boninsegna, vèlch de noscia tradizion, desche l bracel, che i nogn ge dajea ai fioces che l prum del an i jia a ge fèr i augures per se venjer la bombona.

La colega Giulia Capocchi sarà enveze a Vich, al agritur Majon da Mont, olache Elisa e Filippo Rasom contarà de sie lurier da bacan e de la produzion del formai.

No ne resta auter che spetèr la does domesdì per curiosèr…

 (LG)