La Usc di Ladins

Na familia de set persones, con cinch fies, n’outa l era sorì la troèr: n’era amancol tenc beleche te ogne cèsa. Enveze anchecondì, che te la Tèlia nasc semper manco bec, somea vèlch da fora de anter. Aldò de la statistica che ne à sport Martin Bernard del ofize anagrafich de Sèn Jan, te la Tèlia la media di componenc de na familia la é de 2,1 persones, tel comun de Sèn Jan se rua a 2,4 e families con 7 o più componenc n é demò 6.

Anna Depaul e Davide Casella Mariola, ela da Poza e el de naa da la Sicilia, i é sentadins del comun de Sèn Jan e i à duc doi prest 35 egn. I se à maridà de setember del 2013 e del 2014 l é nasciù la pruma fia, Ludovica. Dapò del 2016 l é ruà Samuele, ai 31 de dezember del 2018 Angelica, del 2021 Veronica e dezember del 2023 sia majon sul Piz de Meida é stata endò empienida de balogn e fioches resa, ajache ai 4 l é nasciù Diletta.

‘Che corage’ l é stat fosc la esprescion che i à sentù più de spes, da chi che saea che Anna spetèa l quinto fi. Zachei con na sort de amirazon, autres con aria de desaprovazion, desche se i aessa fat vèlch che no va ben; duc aboncont con marevea.   

Se aon cordà con ic per jir a se fèr contèr mingol de sia esperienza de genitores: en jebia, che Davide l laora da doman e l rua dal lurier domesdì, fajon da le 4, coscita ruon a se ciacolar mingol inant che i gregn rue da scola. Anna la é sentada ju con la picola Diletta sun brac che la dorm serena, Veronica la dorm te cambra e ence Angelica la é a ciasa, percheche l’à mingol de congiuntivite. Dut l é chiet... da olà scomenzone?

Podede lejer duta l'intervista su La Usc stampèda de en vender ai 16 de jené.  (Lucia Gross)