La Usc di Ladins

I era beleche 500 (436 en prejenza più la deleghes) i sozi che en sabeda ai 24 de firé à aproà l bilanz del Fassa Coop, portà dant te la radunanza anuèla te palestra de la scoles a Sèn Jan. 

Fort de n bilanz definì ‘splendido’ dal capo sindaco Mario de Zordo, l president Norbert Bernard à fat con sodesfazion sie intervent, dut per ladin, rejonan soraldut de persones, col recort ai sozi che ne à lascià e l rengraziament a chi che é vejins: tel Consei diretif, sul lurier o desche sozi.
L President à dit che a fèr su mures dut somà se fèsc ence sorì, ma dapò la robes se cogn les fèr jir inant delvers, e per chest l’endesfida maora l é saer troèr, gestir e valorisèr i dependenc. L à recordà l CRAL, l Zircol Ricreatif (de chel che aon scrit sui numeres passé de nosc sfoi) che l é na sort de welfare aziendal di dependenc per i dependenc, e ence l develpai sport da pech a Fausto Depaul per si 40 egn de lurier. L à amò sotrissà l’emportanza de la formazion e l à dit che i venditores non i cogn demò tor su ordenazions ma esser consulenc: ti ultimes 5 egn la speisa per l personal é jita su del 40%, ades l é amò en cors la contratazion coi sindacac – l à dit – ma l Fassa Coop à jà metù via na pèrt per poder ge arsegurèr l mior tratament a si dependenc, che i é 120 dut l an, a chi che se n jonta presciapech etres 50 te sajon.

De più su La Usc stampèda de en vender al prum de mèrz.


 (Lucia Gross)