La Usc di Ladins

En sabeda ai 2 de mèrz te la senta de la scola de musega Il Pentagramma de Fascia e Fiem a Tieser l é stat la audizions di bandisć che se à scrit ite al ejam per ciapèr la medaa de merit musical. Chest an l concors era resservà a otons e percuscions. En dut se à scrit ite 19 sonadores e duc chenc à ciapà sia medaa: 12 chela de bron, 5 chela de arjent e 2 chela de or. 

La zertificazion vegn endrezèda da la Scola de musega ensema a la Federazion de la Bandes del Trentin e la Museghes de Fascia e Fiem. L é na ocajion emportanta de crescimonia tecnica e musicala ma ence per renforzèr l raport anter i bandisć e sia Museghes, ajache più enjigné i é i sonadores e più rica doventa na Banda. La zertificazion engaissa i sonadores a se dèr ju col studie del strument e a se miorèr a do a do. Per chest ciapèr la medaa l é n recognosciment de valuta per l empegn e la dedizion de chi che se met a la proa.

Podede lejer duc i inomes di sonadores premié su La Usc stampèda de en vender ai 8 de mèrz.  (Monica Cigolla)