La Usc di Ladins

Sentèda curta per l Consei del Comun General de Fascia, chiamà ite ai 8 de oril da mesa les 7 da sera, ajache do cena l era l’inaudazion de l’Aisciuda Ladina (de chela che dajon cont te la piates de atualità).

Al orden del dì l era vèlch nomina da fèr en prescia, ma la scontrèda l é stat l’ocajion per duc i prejenc de vegnir metui en consaputa de coche va inant l iter per fèr fora la caserma Vittorio Veneto, che doventarà la neva senta del Comun General.

L conseier de procura Carlo Ganz à dit che l é stat ben 110 proponetes che é ruèdes ite al bando, fat aldò de indicazions spezifiches dates dal Comun General. L iter del concors vegn portà inant dal Consorzie di Comuns e la Comiscion é vidèda da la funzionaria provinzièla Lorena Selva e la tol ite l tecnich del Comun de Moena Alberto Dallio e l funzionarie del Comun de Trent Alberto Ricci.  Duta la proponetes de chesta pruma fasa, averta a duc, é jà states vardèdes fora e l é stat cernù i 5 projec che passa a la seconda fasa: anter chisc sarà l venjidor, che vegnarà anunzià ai 29 de mé.

Ganz à dit che no se pel saer i inomes di 5 finalisć, ma ge é stat arsegurà che l é projec de valuta, che respon ai criteries metui dant dal CGF en cont de atenzion al inseriment armonich tel ambient, doura di materièi e tecnologies costrutives, calità e funzionalità di spazies de lurier e efizienza per l sparagn energetich. 

De più, con la nomines de la Comiscion di ejames de ladin, su la Usc stampèda de en vender ai 12 de oril.

 (Lucia Gross)