La Usc di Ladins

L é stat dassen pien e empegnatif chest meis de mé, per la Scola de musega Il Pentagramma... e no l é pa amò fenì!

Chesta istituzion à fat crescer dassen n muie l livel de competenza e calità tel setor de la musega te noscia valèdes. Vidèda dal president Stefano Lazzer e dal diretor Roberto Silvagni, anchecondì anter Fascia e Fiem chesta Scola la tol ite zirca 600 arlieves de ogne età e l’à 23 ensegnanc.

L an passà l Pentagramma à festejà i 40 egn de atività e per l cedean l é stat metù a jir n muion de evenc: parea na roba straordenèra, ma se veit che i à ciapà gust... defat chest an i à metù adum n program de 14 conzerc te nience n meis, te 7 desferenc Comuns de la valèdes, tolan ite passa 500 sonadores e ciantarins de la scola ma ence de fora da la scola con de bela colaborazions. E dut chest zenza contèr i ‘saggi’ mendres de la fin del an che vegn fac a na vida resservèda per i più picoi e si genitores, e soraldut i momenc endrezé te la cèses de paussa per ge portèr mingol de legreza ai giaves.

De più su La Usc stampèda de en vender ai 24 de mé.  (Lucia Gross)