La Usc di Ladins

Setember l é l meis dedicà al Alzheimer e per chesta ocajion l Servije sozio-assistenzièl del Comun General de Fascia envia duc a tor pèrt a l’inaudazion de na mostra che vegn metuda fora, en colaborazion col Comun de Sèn Jan, su la Promenada Enlongia Ruf, la strèda da jir a pe, apontin enlongia l ruf de Sèn Nicolò sa Meida.

La mostra, dal titol »Quotidiani Paralleli« tol ite na lingia de gregn retrac n muie segnificatives en bianch e fosch realisé da Luca Chistè che raprejenta n viac fegurà tel mond del Alzheimer e, descheche à dit la curadora Giovanna Calvenzi, la vel soscedèr la reflescion su la dimenscion de la malatia e sul peis che l’à a livel sozièl e psicologich per chi che é tocé diretamenter.

Chesta esposizion fèsc pèrt de la scomenzadives endrezèdes tel chèder del Pian Trienal per l svilup de na Comunanza amica de la persones con demenza che vegn portà inant ence dal Comun General de Fascia en colaborazion con la Comunità teritoriala de Fiem, l Comun de Sèn Jan, l’Azienda Provinzièla per i Servijes Sanitères, la Sociazion Rencureme e la Coprativa sozièla Le Rais.

La mostra »Quotidiani Paralleli« vegn inaudèda en mercol ai 18 de setember da les 5 domesdì, sa Meida lo dal crousdevia anter Strada Don Lodovico Gross e Strada Sas da le doudesc (Pont de Craut) e la restarà fora fin ai 16 de otober. 

En ocajion de l’inaudazion vegnarà prejentà ence l percors »Amica de la persones con demenza« con la tabeles e la banches realisèdes da la Coprativa sozièla Oltre. Se fossa catitemp l’inaudazion sarà semper sa Meida, te Ciasa de Noscia Jent.  (lg)