La Usc di Ladins

Instouta tochèa ai sonadores de clarinet, flaut, sax, oboe e fagot se dèr ju per se vadagnèr la medaes al valor musical. Belapontin ence chest an la scola de musega Il Pentagramma, ensema a la Federazion de la Bandes del Trentin, à endrezà l concors che envia i musizisć, mascima de noscia Museghes, a portèr dant n program musical tedant a na comiscion de esperc. I trei livie de dificoltà, che corespon a la trei medaes, l é or, arjent e bron; n an l concors l é resservà a otons e percuscions, l an do ai strumenc che fèsc pèrt de la categoria di legnes. »No l é na competizion, ma n obietif che fèsc crescer la pascion per la musega, l leam con tia Banda e che miora ence tia tecnica e tia musicalità«, coscita à scrit la Scola Il Pentagramma sui social.

Embendapò, en sabeda e en domenia ai 29 e ai 30 de mèrz te la senta de la scola fora Tieser se à dejout la audizions de chest an resservèdes ai legnes, olache à tout pèrt passa 40 candidac vegnui ence da foradecà. "L é stat na gran sodesfazion" ne à dit l diretor de la scola Roberto Silvagni.

Se pel lejer dut, coi inomes di fascegn premié, su La Usc nr 14 dai 11 de oril: sul sfoi stampà che se pel troèr ence te la boteighes de sfoes de la valèdes ladines o sul pdf per i aboné al e-paper.


 (Nicoletta Riz)