La Usc di Ladins

Siede pascioné de cinematografia e aede tel cef che rodolea na idea, una de cheles che no veit l’ora de vegnir fora? Emben ades podede ve meter a la proa. L é vegnù fora »L Cucarel«, l prum concors per projec cinematografics per ladin, ideà col obietif de sostegnir la produzion de curc filmac tel idiom de mendranza de la valèdes dintorn l Sela. L concors l é out belapontin a duc chi che à na idea da trasformèr te n audiovisif e volessa durèr te la narazion e ti dialoghes una de la variantes ladines del Sela (fascian, badiot, gherdëina, anpezan, fodom), strumenc linguistics da marevea e da la sfumadures originèles.

L projet l é porta dant da la Coprativa sozièla INOUT co la colaborazion del Istitut Cultural Ladin Majon di fascegn e col sostegn de la Region Autonoma Trentin/Südtirol.

L’idea del concors »L Cucarel« la nasc tel chèder del projet Troupes, realisà l an passà da la Coprativa sozièla INOUT, en colaborazion con Sabrina Rasom, diretora del Istitut Cultural Ladin Majon di Fascegn e col sostegn del Pian di joegn de Fascia La Risola.
Duc chi che vel tor pèrt al concors, i cognarà manèr sia proponeta inant che sie fora l prum de otober 2025.

Chi che vel cognoscer miec l concors pel jir anché, vender ai 27 de jugn da les 17:30 te Museo Ladin a Sèn Jan olache l grop de INOUT portarà dant duc i detaes. L avis de concors se pel jà l troèr sul sit www.inoutfassa.com/cucarel.

De più ence su La Usc stampèda de en vender ai 27 de jugn del 2025.