La Usc di Ladins

Ince a Lungiarü tonel, mo cun plü sonn y ritm. Al é le dër’ momënt: a inaudé la sajun di temporai röiel la pröma CD dl grup da Lungiarü »Überspannung«, che sará da ciafé cun i 4 de messé. »Es braucht mehr« é le titul dla CD nöia, che porta adöm plü stii musicai. Rock, punk, metal y musiga eletronica s’incunta por rové adöm te n stamp musical che röia pormez al stil conësciü sot al inom de NDH (Neue Deutsche Härte) – »Na musiga plü döra, plü scöra, che á forza y dá energia«, dij Georg Steinfeld, inom d’ert dl ciantadú a ce dl grup.

Canche la tenjiun crësc y vá sura le limit de toleranza preodü, podessel gní a s’al dé dagns. Sciöche na stiza o n tarlí, pó chësta forza ciariada sö d’eletrizité de un n vers spaché mo dl ater vers afasciné, portan na saita de löm tla scurité.

»Scebëgn che gran tenjiun pó porté dagns y spaché, mësson ince dí che dala desdruziun pól nasce val’ de nü«, dij Georg Steinfeld por splighé sciöche le grup á ciafé so inom. L’archirida dl inom á doré n pez, mo á porté so früt: »L’inom é na bona descriziun dla musiga che i fajun, mo ince dla tenjiun che i sintiun te nos canche i sonun deboriada. Tl fá musiga ne orunse nia sté tla norma y se tigní a regoles, mo i orun rumpí cun chëstes y lascé rogore la forza che la musiga sá da trasmëte«.


Deplü da lí ciafëise tla ediziun nöia da incö, vëndres ai 27 de jügn!