La Usc di Ladins

L é na neva che no se se spetèa, amancol no scì prest, chela vegnuda fora chisc dis, e che i medemi enteressé i à sapù demò da pech. Don Andrea Malfatti, ruà de otober del 2014 a rejer la parochies de Vich, Poza, Pera, Soraga e Mazin, l meis de otober che vegn l lasciarà Fascia per jir a Rorei. L Piscop Lauro Tisi ge à dat su la parochies de Borgo Sacco e de San Giorgio, e l ge à domanà ence n empegn maor tel ensegnament al ISSR, l Istitut de Scienzes Religiouses de Trent.

La neva ge é stata comunichèda da don Andrea ai Comitac parochiai e al Consei Pastoral en mercol ai 25 de jugn, vea de la Festa de Sèn Vile patron de la diozesa, desche da indicazions del Piscop, e l'à lascià duc zenza paroles. Al despiajer de la comunanza parochiala e a l'emozion del medemo don Andrea, se à jontà l cruzie tel saer che da la Diozesa no vegnarà manà nesciun auter preve te Fascia a sie post: don Mario Bravin, ruà d'uton del 2015 te la parochies de Ciampedel, Cianacei e Dèlba, cognarà se cruzièr ence de Mazin, Pera, Poza, Vich e Soraga.

N cruzie che se jonta ampò a la legreza de saer che l é n preve jà cognosciù e aprijià, che se à jà fat ite con la comunanza, la cultura e l lengaz de Fascia; ampò de segur l arà besegn de n aiut amò maor da man de duc si "veies" e "neves" parochiegn.

I componenc del Consei Pastoral e di Comitac de la parochies de la Val de sot ge à sport n develpai bon fort a don Andrea per chel che l à fat te chisc 10 egn te noscia comunanza: detelpai che ge vegnarà palesà con amò maor forza da duc ai 5 de otober, canche l à en program de lascèr sia parochies.

N'autra neva te la nomines del Piscop don Lauro Tisi revèrda l preve da Moena don Devis Bamhakl, ordenà jai 5 egn, che da chest uton l rejarà la parochies de Pardac, Juan e Pancià.

 (Lucia Gross)