La Usc di Ladins

L grop de robotica Gome neve de la Scola Ladina de Fascia dai 10 ai 16 de jugn l à partezipà ti Stac Unii a la garejèdes internazionèles de la First Lego League 2025, competizion che te la Tèlia tol ite più che 300 squadres e mile e mile joegn te dut l mond. Per la squadra fascèna, che ti USA raprejentèa la Tèlia, se trata de n travert storich e de gran valor, mai arjont dant ti 12 egn passé de endesfides, otegnù de gra ai ezelenc resultac concosté ai Campionac nazionèi de la competizion tel meis de mèrz.

La squadra di nef studenc Emma, Claudia, Megy, Greta, Emilio, Marco, Riccardo, Jacopo e Matteo, ensema a si coach Martina, Matteo, Filippo, Francesco, Samuele, Nicole, Ilaria, Nicolò e ai dozenc Thomas Zulian e Gianantonio Bettega, ti ultimes dis del an de scola l’à podù saludèr la classes e sgolèr da l’autra man del ozean, per tor pèrt al event internazionèl de robotica endrezà dal College WPI (Worcester Polytechnich Institute) te la zità de Worcester, apede Boston. Tel Massachusetts, ensema a etres 107 gropes de joegn da dut l mond, da l’Asia, da l’Australia, da l’Africa, da l’Europa e dal Sud America, le Gome neve de Fascia les se à dat ju, fajan jir l robot sul desch de gara american e prejentan sia enrescides scientifiches lurèdes fora sul tem del ozean.

Conscidrà l aut livel de la squadres che à tout pèrt a la garejèda, le Gome neve no les é states bones de arjonjer i prumes posć de la classifiches finèles, descheche l era stat enveze a livel nazionèl. L’esperienza americhèna la se sera su aboncont con gran sodesfazion da man de dut l grop, che ti dis te l’America l à vivù esperienzes che ti egn che vegn ge didarà a se miorèr amò de più.

Ades l an de scola l é fenì, ma l grop de robotica ladin l vèrda jà a la endesfides 2026 e al event de First Lego League, che per la pruma outa te la storia l ruarà ence te Fascia. De jené al teater Navalge de Moena, con na colaborazion anter Scola Ladina e Coprativa sozièla Inout, vegnarà metù a jir la selezions del nord-est per gropes de bec e joenec dai 9 ai 16 egn, de calificazion ai campionac nazionèi FLL 2026.

De più, coi comenc di protagonisć, su La Usc stampèda de en vender ai 27 de jugn del 2025.


 (Thomas Zulian)