La Usc di Ladins

Doi poejies de muvimënt
L Circolo–Lia Mostra d’Ert nvieia ala segonda edizion dl festival de bal ncuei, vënderdi ai 27 de juni dala 20:30 tla Cësa di Cungresc a Urtijëi
L dejidere dl Circolo – Lia Mostra d’Ert ie de lië la belëza dl bal ala cun­tredes dla valedes ladines, che fej mprescion.
L ie n’ucajion per valorisé, tres l’ert, la mpurtanza storica y nce turistica dl raion, cher­dan adalerch n gran numer de vijitadëures, danter partezipanc, ghesć y publich dla mani­festazion. Cuer y zënter dl pruiet ie la produzion de na manifestazion de bal cun i balarins Ana­stasia Kostner, Riccardo Meneghini, Sa­­brina Fraternali, Camilla Bundel de »Tanz­schmiede/Fucinadanza«. La prima pert dla sëira ie »Fremde Freunde« (20 menuc). Do n intermezzo (10 menu), saràl da udëi la segonda pert »Cyclic Bliss« (40 menuc).
Per plu nfurmazions y per resservé chertes per l balet cherdé su l numer de telefon 377 5936350.

Mostra coletiva »L sonn dl cheder«
N vënderdi ai 27 de juni dala 18:00 vëniel giaurì tla galaria Vijion a Puntives la mostra »L sonn dl cheder«, che se dà ju cun l liam danter mujiga y ert visuela
La mujiga y l’ert visuela se à da for incà nfluenzà l’una cun l’autra. Cun l scumenciamënt dl ‘900 ie chësc liam unì for plu y plu strënt, giaurian pusciblteies y vijions zënza fin. La mostra à l fin de mustré coche la mujiga à ispirà la pitura y la scultura, cun opres crisses ora aposta per chësta tematica. Per reprejenté ritm, tonn, armunia, muvimënt o la dinamica dla mujiga, ie l’astrazion la forma d’ert plu adateda. Da udëi tla mostra saràl opres di set artisć nternaziunei Manuela Bedeschi, Flavio Senoner, Karsten Hein, Rabeah Mashinchi, Jeremi Ca, Gerhard Hotter y Laura Pan.
La mostra resterà da udëi nchin ai 19 de lugio, dal lunesc nchin sada dala 16:00–19:00, o cherdan su l 338 2098697.

»Ristla«
L Circolo–Lia Mostra d’Ert nvieia de cuer ala giaurida dla mostra »ristla« tl self dla lia, ai 4 de lugio dala 18:00
Per l prim iede prejënta i artisć Veronica Moroder y Jochen Hautzdorf si lëures te na mostra de pèr. La pitëura Moroder crieia cun culëures vives chedri sun plu livei, deslian la figures te culëures y formes.
Hautzdorf mpresciunea cun si scultures che dà la mprescion de lesirëza. Si pratica artistica proa a ntënder la realtà, ngrandian y mudan la forma dla cosses de uni di y ti tulan si funzion uriginela.
Per la mostra »ristla« porta Moroder y Hautzdorf mo n terzo prutagunist: l »Spinario«. Iel pa n paralelism danter chësc motif dla storia dl’ert y la pratiches artistiches di doi artisć? Chësta dumanda nvieia a ti cialé ala mostra da na pruspetiva nueva.
La mostra resterà da udëi nchin ai 23 de lugio, dal merdi ala dumënia dala 16:00–19:00 y de sada y dumënia nce danmesdì, 10:00–12:00.
N vënderdi ai 11 de lugio saràl daviert nce dala 20:00–22:00–i artisć sarà prejënc. Ntan la finissage ai 23.07. gëura la mostra bele dala 14:00.

Segra de Urtijëi
La Mujiga de Urtijëi nvieia ala segra de Urtijëi n sada ai 5 y n dumënia ai 6 de lugio sun Plaza de Sant Antone
La segra, ntan chëla che n puderà for giapé velch de bon da maië y da bever, scumëncia n sada dala 12:00 cun n bel cunzert dla Mujiga di Jëuni de Gherdëina. La jirà pona inant cun i »Odlesound« y cun la Mujiga de Zwölfmal­greien. Da sëira ve tën la grupa »One Night Band« cumpanìa.
N dumënia do la gran Santa Mëssa, saràl la defileda tradiziunela dla trohtes y l cunzert dla mujiga de Sëlva y Unterinn. De dumënia puderà i mëndri se lascé depënjer l mus. Dala 18:00 inant sunerà la grupa »Rifflblech XL«.
La Mujiga de Urtijëi se ncunforta sun Vo!

»Mostra & aperitif« tl MusLa
Le Museum Ladin inviëia a »mostra & aperitif« cun le grup Thermos
En jöbia ai 3 de messé pita le MusLa Ciastel de Tor vijites menades fora por la mostra »Countdown to Mass Extin­ction?« cun le paleontologh Her­wig Prinoth, dales 16:00 por todësch y dales 17:00 por talian. Dales 18:00 ales 20:00 pón spo se gode n bun aperitif cun mu­siga dl grup »Thermos«, metü adöm da Magdalena Oberstaller (vidora y usc), Theresa Falken­steiner (usc) y Jonas Oberstaller (usc, synthesizer y electronics). 
Por la vijita menada periunse do na prenotaziun por e–mail a prenotaziuns@museumladin.it o por telefon al 0474 524020. 
La vijita menada costa 10,00€.