La Usc di Ladins

Lois, en chësc ann recorda le Sorvisc ai Jogn Val Badia sü pröms 40 agn de vita. Dan da püch á la istituziun ince podü pié do la onoranza por les "ezelënzes dl volontariat jonil". Tö es sté n protagonist dla pröma ora y es sté ala pert por daidé da le mëte sö. Co é pa nasciü le SaJ y co este pa tö rové lapró?
Te na intervista por i 20 agn Sorvisc ai Jogn â siur Sepl Granruaz dit: "Döt é pié ia sön la spona dl mer sot a sorëdl ala fin di agn 70." Al ê n bun compagn dl degan da Türesc, siur Leo Munter, y deboriada ponsâi a na forma de aiüt por i jogn da pert de adulc che i ess daidé pro le laur che volontars fajô ti grups. I caplans metô man da mancé, i curac gnô plü vedli y al gnô a mancé le lian cun i jogn. Na te’ istituziun portada dales cöres cun personal a tëmp plëgn ess podü ti dé n gran sostëgn ai coordinadus y ales coordinadësses di grups (dantadöt SKJ) ti singui paisc. Defat á le dagan Leo Munter fondé dl 1979 le pröm sorvisc ai Jogn a Türesc.
Iö sun rové lapró te na manira – da ciaré zoruch – afascinanta. Dl 1980 m’â le diretur dl Istitut Ladin Lois Craffonara fat jí a Tils a baié cun siur Sepl che ê dailó curat por tigní val’ referat te n program de formaziun ch’i â l’inciaria da mëte a jí. Te chë ocajiun m’ál cunté de chësc proiet por i jogn dl degan da Türesc y che al ess orü le istituí ince tla Val Badia canch’al foss gnü degan (1982). Y i me recordi ciamó la frasa "y tö me daidaras, catö?". Insciö éra stada ch’i sun sté dailó pro la fondaziun y concretamënter ince ti agn dedô. En referimënt al’onoranza da pert dl’Euregio al sorvisc ai Jogn Val Badia y ala Nëus Jëuni Gherdëina oressi dí che ara onorëia dötes les tröpes porsones che á dé ca tëmp, idees, sforc, entusiasm por chëstes döes istituziuns ti ultims 40 agn. Düc se mirita n grandiscim complimënt y giulan! 

Döta la intervista ciafëise t’La Usc di Ladins di 27 de jügn. 


 (Intervista: Pablo Palfrader)